Элчихона ва Бош консулликка Ўзбекистонга учишни истаган фуқаролар рўйхатини тузиш топширилди
Ҳурматли ватандошлар!
Сизларга Ўзбекистоннинг Бирлашган Араб Амирликларидаги элчиси Ибрагимов Бахтиёр мурожаат қилмоқда.
Юзага келган ҳолат юзасидан Сизлардаги хавотир ва кейинги қадамлар бўйича пайдо бўлган кўплаб саволларингизни тушунаман.
Ўзбекистон Республикаси Ҳукумати номидан давлатимиз ҳеч бир ватандошини эътиборсиз ва қаровсиз қолдириб қўймаслигини маълум қиламан.
Менинг ҳамкасбим - Ўзбекистоннинг БААдаги бош консули Алишер Саломов томонидан билдирилган Ўзбекистон Республикаси авиақатновлари вақтинча тўхтатилишига қарамасдан барча хоҳловчилар Ватанимизга қайтарилиши юзасидан хабарини тасдиқлайман.
БААдаги эпидемиологик ҳолат бошқа мамлакатлар, жумладан Европа давлатлари ёки Эронга нисбатан хотиржамлигига ва у ерда хам Ўзбекистон фуқаролари, ака-сингилларимиз қолиб кетганлигига эътибор қаратишингизни сўрайман.
Ҳозирда биз ўз фуқароларимизни БААдан Ўзбекистонга олиб чиқиб кетиш тартиби ва тизимини аниқлаш юзасидан Тошкентдаги мутасадди идоралар билан биргаликда ишламоқдамиз.
Жорий йил 15 март соат 23:00 ҳолатига кўра қуйидаги ҳаракатлар алгоритмига амал қилишингизни сўраймиз:
1. 2020 йил 16 март кунги «Uzbekistan Airways» АЖ HY-334 Дубай-Тошкент парвози бекор қилинди. Сотиб олинган билетлар бўйича маблағларни қайтариш, қайта бронь қилиш «Uzbekistan Airways» АЖнинг БААдаги ваколатхонасининг юқоридаги хабарномаси асосида амалга оширилади;
2. Ўзбекистоннинг БААдаги фуқароларини Ватанга қайтишини ташкил қилиш масаласини ҳал қилиш бўйича Ўзбекистоннинг БААдаги элчиси бошчилигидаги элчихона, бош консуллик, «Uzbekistan Airways» АЖ ходимларидан иборат Тезкор штаб тузилмоқда.
Штаб Ўзбекистоннинг Дубайдаги Бош консуллиги биносида жойлашади ва 2020 йил 16 март соат 00:00 дан бошлаб ҳолат яхшилангунга қадар фаолият кўрсатади;
3. Ажиотаж, ваҳимали ҳолатларни, ҳамда инфекция тарқалишини олдини олиш мақсадида ватандошларни мамлакатимизга қайтишини ташкил қилиш юзасидан имкон қадар шу Телеграм каналидан фойдаланиш, штабга фақатгина таклиф қилинган пайтда ёки жуда зарур ҳоллардагина келишингизни сўраймиз.
4. Юқорида бош консуллик томонидан таъкидлаб ўтилганидек, ушбу Телеграм гуруҳидаги расмий маълумотларни кузатиб боришингизни ва телеграм гуруҳи фаолияти юзасидан имкон қадар кўпроқ ватандошларимизни хабардор қилишингизни илтимос қиламиз. Шунингдек, ушбу телеграм гуруҳидан фойдаланиш тартибига риоя қилсангиз мамнун бўлардик.
5. БААдаги барча давлат ташкилотлари – элчихона, бош консуллик, «Uzbekistan Airways» АЖ ходимлари доимо Сизларнинг ихтиёрингизда бўлади. Маълумот олиниши билан Сизларни тезкор равишда хабардор қиламиз.
Шахсан ўз номимдан Сизлардан хотиржамлик сақлашингизни ва шундай ноқулай вазиятни биргаликда енгиб ўтишимиз учун ўзаро бирлашишингизни илтимос қиламан.
Биргаликда биз юзага келган барча қийинчиликларни енгиб ўтувчи кучмиз.
Эҳтиром ила,
Бахтиёр Иброҳимов
____________________________________
Ҳурматли ватандошлар!
Ҳозирда «Ўзбекистон Ҳаво Йўллари» авиакомпанияси вакиллари билан ҳамкорилкда барча хоҳловчиларни уйга жўнатиш механизми ишлаб чиқилмоқда. Ушбу гуруҳ аъзолари ҳушёр бўлишга ва шахсий гигена қоидаларига риоя қилишга чақирилади. Биз самимий равишда сизлардан хотиржамлик, инсонпарварлик, ўзаро тушуниш ва сабр-тоқатлик кутиб қоламиз. Айни дамда, тасдиқланмаган маълумотларни тарқатишдан сақланишингизни сўраймиз.
Элчихона ва Бош консулликка Ўзбекистонга учишни истаган фуқаролар рўйхатини тузиш топширилди. Уйга учиш истагини билдирган фуқаролар ўзларининг маълумотларини (исм-шарифи, паспорт рақами, учиш куни, виза тугаши муддати, БАА даги алоқа телефон рақами) консулликка электрон почта орқали юборишни сўраймиз: ae.uzconsulate@mfa.uz.
Мурожаатчилар рўйхатини олгандан сўнг, ватандошларимизнинг уйларига қайтишлари учун Ўзбекистонда чартер рейслари ташкил этилади. Шахсан мен, Алишер Саломов, Ўзбекистоннинг Дубай ва Шимолий Амирликларидаги Бош консул ива менинг жамоам Дубай шаҳрида сизларга давлатимиз номидан ҳар томонлама ёрдам беришга тайёрмиз.
Шу муносабат билан, ватандошларимизни қўллаб-қувватлаш мақсадида фавқулодда штаб тузилди.
Штаб алоқа рақами: +971 4 370 6060
Электрон манзил: ae.uzconsulate@mfa.uz
